İraq təhlükəsizlik qüvvələri bu ölkə parlamentinin deputatı Əhməd əl-Əlvanini bu gün səhər əl-Anbar vilayətinin mərkəzində ər-Rəmadi şəhərində həbs ediblər.
əl-Anbar vilayətinin təhlükəsizlik mənbələri bildiriblər: Əhməd əl-Əlvaninin cangüdənləri təhlükəsizlik qüvvələri ilə toqquşublar. Bu toqquşmada əl-Əlvaninin qardaşı həlak olub və bir neçə cangüdən də yaralanıb.
İraq hökuməti bu deputatı hökumətə qarşı aksiya meydanlarında fitnə amillərindən və əl-Qaidə ilə əlbir olmaqda suçlayır.
İraq baş naziri Nuri Maliki deyib: İraqı əl-Qaidə terrorçularından təmizləyənə qədər hərbi əməliyyat davam edəcək.
İraq hökuməti ötən gün əl-Qaidənin bəzi məhbus ünsürlərinin etiraflarını yayımlayıb.
Bu etiraflarda bildirilir ki, əl-Anbar vilayətində çadırlarda aksiyalar keçirən əl-Qaidə başçıları hökumətə qarşı əməliyyatlar, avtomobillərə bomba quraşdırılması və sonra isə onları şiə sakinli şəhərlərdə partlatmaq üçün məkrli işlər həyata keçirirlər.İraqın sünni sakinli qəbilələrinin başçıları da əl-Qaidə ilə mübarizə üçün hökumətin layihəsini dəstəkləyiblər.