İran İslam Şurası Məclisinin ölkə prezidenti Həsən Ruhaninin təklif etdiyi Nazirlər Kabineti üzvlərinin səlahiyyətlərinin araşdırılması prosesini artıq 4-cü gündür ki, davam etdirir. Bu gün səhərdən İslam Şurası Məclisinin açıq iclasında nazirlik postlarına namizədliyi təqdim edilənlərlə bağlı mübahisələr yenidən start götürüb.
Ötən 3 gün ərzində 12 nazirlik postuna o cümlədən Təhsil, Milli Təhlükəsizlik, Rabitə və İnformasiya Texnologiyaları, İqtisadiyyat və Maliyyə Məsələləri, Xarici İşlər, Səhiyyə, Kooperasiya, Əmək və Sosial Rifah, Kənd Təsərrüfatı, Ədliyyə, Müdafiə, Yol və Şəhərsalma nazirliklərinə namizədliyi irəli sürülən şəxslərin səlahiyyətləri araşdırılıb, müvafiq və müxalif olan deputatların çıxışları dinlənilib.
“Sənaye, Mədən və Ticarət”, “Elm, Təhqiqat və Texnologiya”, “Mədəniyyət və İslami İrşad”, “Daxili İşlər”, Energetika və “İdman və Gənclər” nazirlikləri üçün isə daha 6 namizədin səlahiyyətinin araşdırılması lazım gəlir.
İran İslam Şurası Məclisinin sədri Əli Laricaninin dediyinə görə, yerdə qalan namizədlərin səlahiyyətlərinin araşdırılması prosesi bu gün başa çatmalıdır. Nazirlik postuna namizədliyi irəli sürülən hər bir şəxs barəsində 2 müvafiq və 2 müxalif deputat hər biri 15 dəqiqə müddətinə çıxış edərək, yeni nazirin gələcək proqramları ilə bağlı nöqtə nəzərlərini bildirir.
Daha sonra prezident münasib gördüyü təqdirdə namizədliyini təklif etdiyi naziri və onun proqramlarını müdafiə üçün 30 dəqiqə müddətinə çıxış edir.
Nazir postuna namizədliyi təqdim edilən şəxslərin səlahiyyətləri nazirliklərin adlarının əlifba sıralaması əsasında araşdırılır.
Ölkə prezidenti nazirlərin zamanından istifadə edərək, sonda və kompleks şəklində onları müdafiə edə bilər. Daha sonra səsvermə həyata keçirilməli və səslərin sayılmasının ardınca nəticəsi elan olunmalıdır.
İran İslam Şurası Məclisinin sədr əvəzi Məhəmmədrza Bahunər yeni Nazirlər Kabinetinin səlahiyyətinin İslam Şurası Məclisinin açıq iclasında araşdırılmasına işarə edərək, deyib: Nazirlərin səlahiyyətlərinin araşdırılması prosesinin başa çatmayacağı təqdirdə, səsvermənin 3-cü mərhələdə keçiriləcəyi ehtimal olunur.
İran Konstitusiyasına əsasən Nazirlər Kabinetinin təşkili İslam Şurası Məclisi üzvlərindən etimad rəyinin alınması ilə şərtləndirilib.
