Tehranın cümə namazı xətibi İran xalqının dinc məqsədlər üçün olan nüvə fəaliyyətlərini öz qanuni haqqı bildiyini deyib.
Höccətülislam vəlmüslimin Kazım Sədiqi bu gün Tehranın cümə namazı xütbələrində İran ilə 5+1 Qrupu arasında baş tutan Almatı müzakirələrinə işarə edərək, deyib: İranın mövqeyi dəyişməzdir. Çünki, İran xalqı dinc məqsədlər üçün nüvə fəaliyyətlərinə malik olmağı öz haqqı bilir və heç bir qüdrətdən də qorxmur.
Tehranın müvəqqəti imam cüməsi ABŞ prezidenti Barak Obamanın “İrana nüvə silahı əldə etmək icazəsi verməyəcəyik” deməsinə işarə edərək, vurğulayıb: İran İslam Respublikası İslam İnqilabının Böyük Rəhbərinin fitvası və göstərişləri əsasında nüvə silahı əldə etmək ardınca deyil. Amma, İran nüvə silahı əldə etmək istəsəydi belə, heç bir qüdrət, hətta Amerika belə İran İslam Respublikasına mane ola bilməzdi.
Höccətülislam vəlmüslimin Kazım Sədiqi daha sonra nüvə fəaliyyətlərinin dayandırılması ilə bağlı istənilən təklifi qəbuledilməz adlandırıb və heç bir ölkə rəsmisinin də belə bir sazişə getmək haqqına malik olmadığını bildirib.
Tehranın cümə namazı xitabətçisi İslam İnqilabı Keşikçiləri Korpusu Sepah-ın “Böyük Peyğəmbər-8” hərbi manevrinin uğurlu keçirilməsinə də işarə edərək, bu manevrin İranın düşmənləri üçün ciddi müraciətə malik olduğunu bildirib və deyib: Düşmənlər bilməlidirlər ki, İran xalqı təcavüzkar qüdrətlər qarşısında dayanacaq və keçmişdə olduğu kimi qələbə çalacaq.