Suriya prezidenti Qərb ölkələri başçılarından ölkəsinin daxili işlərinə müdaxilə etməmələrini istəyib.
Suriya prezidenti Bəşşar Əsəd Rusiyada çıxan İzvestiya qəzeti ilə müsahibədə Qərb ölkələri başçılarından digər ölkələrin daxili işlərinə müdaxilə etməmələrini və əlaltı rejimləri hakimiyyətə gətirməmələrini istəyərək, deyib: Suriyaya istənilən xarici müdaxilə məğlubiyyətə məhkumdur və Suriya ordusu bu ölkənin milli hakimiyyətini qorumaq üçün tam hazırlığa malikdir.
B.Əsəd Amerikanın digər ölkələrə müdaxilələrinə işarə edərək, deyib: Amerika bu müharibələrin hamısında məğlubiyyət ilə üzləşib və bu acı təcrübələr ABŞ rəsmiləri üçün bir növ təhlükə siqnalı sayılmalıdır və başa düşməlidirlər ki, müharibənin heç bir faydası yoxdur və yalnız dağıntılara və fəlakətə səbəb olacaq.
Suriya prezidenti ABŞ-ın ölkəsinə qarşı hücum ehtimalı haqda da deyib: Suriyaya hərbi müdaxilə ehtimalı birinci dəfə gündəmə gətirilən məsələ deyil. Suriyada böhranın yarandığı ilk gündən onlar Suriyaya hərbi müdaxilədən söz açdılar və Amerika, İngiltərə və Fransa Suriyaya hücum etməyə çalışdılar. Lakin, onlar dünya xalqları və dövlətlərini Yaxın Şərqlə bağlı siyasətlərinin məntiq və ağıl üzərindən yürüdüldüyünə inandıra bilmədilər.
Bəşşar Əsəd daha sonra deyib: Onlar istənilən müharibədə başlayan tərəf ola bilərlər. Lakin, müharibənin nə qədər uzanacağını bilmirlər və müharibənin hansı məntəqələrə sıçrayacağını da proqnoz edə bilmirlər.
B.Əsəd əlavə edib: Qərb dövlətləri və onların ərəb müttəfiqləri bilməlidirlər ki, Suriya hökumətini Qərbin əlaltısına çevirməyi arzu edənlər öz istəklərinə çatmayacaqlar. Çünki, Suriya müstəqil bir dövlətdir və terrorizm ilə savaşacaq, öz xalqının rifahını təmin etmək üçün istədiyi ölkə ilə münasibətlərə malik olacaq.
Suriya prezidenti həmçinin, Qərbin kimyəvi silahlardan istifadə ilə bağlı Suriya hökumətinə qarşı səsləndirdiyi ittihamları rədd edərək, deyib: Qərb və Amerika siyasətçilərinin iddiaları sağlam düşüncəyə hörmətsizlik və ümumi fikrə etinasızlıq deməkdir.
B.Əsəd əlavə edib: Belə bir ittihamın irəli sürülməsi yalnız siyasi xarakterə malikdir və bu kimi ittihamların irəli sürülməsinə səbəb Suriya dövlətinin terrorçular qarşısındakı qələbələridir.