Hacı Tale Bağırov: Xalqın hakimiyyəti tam bərqərar olana qədər biz bu rejimlə mübarizəmizi davam etdirəcəyik
İlahiyyatçı Hacı Tale Bağırov zindandan İslamazeri.az-a yeni məktub göndərib
Məktubda deyilir:
“Allahın salamı olsun müsəlman bacı və qardaşlarımıza! Əziz müsəlman bacı və qardaşlarım! Son dövrlər, xüsusilə də İslam coğrafiyasında acı hadisələr müşahidə edilməkdədir. Bəhreyndə, İraqda, Fələstində, Misirdə və digər müsəlman məmləkətlərində törədilən cinayətləri, ürək dağlayan səhnələri izləmək biz müsəlmanlar üçün həddindən artıq çətindir. Ürək yanğısı ilə yalnız dua etməyə gücü çatan müsəlman üçün bu səhnələri görmək daha dözülməzdir. Bütün bu dərdlər, acılarla yanaşı, İslam dünyasının bir parçası olan vətənimiz Azərbaycanda, 20 ildir xalqın sərvətlərini talan edən rejimin dinimizə və müsəlmanlara qarşı yürütdüyü çirkin siyasəti hələ də davam etməkdədir. Mövcud olan rejim 20 illik hakimiyyəti dövründə törətdiyi cinayətləri, yaratdığı sosial-iqtisadi böhranlara yanaşı, xalqın inancına, heysiyyətinə belə toxunmaqdan çəkinməyib. Buna misal olaraq, artıq neçə illərdir orta ümumtəhsil məktəblərində İslam dininin iffət və ismət simvolu sayılan hicaba qarşı tətbiq edilən süni qadağalar və bu çirkin siyasətə etiraz edən çox saylı inanclı vətəndaşların, ilahiyyatçı alimlərin günahsız yerə zindanlara atılmasını göstərmək olar. Sözsüz ki, bütün bunların başında duran, dildə dindən, islamdan dəm vuran, amma həqiqətdə dinsiz olan rejim dayanır. Bütün bu çətinliklərə baxmayaraq, müsəlman xalqımız rejimin çirkin siyasətinin, amansız repressiyalarının qarşısında mətinliklə durmuş və izzət və şərəflə dolu olan mübarizəni davam etdirməkdədir. Bu mübarək mübarizəmizin yer üzünün sonuncu höccəti olan Həzrəti Mehdinin (əc) gəlişinə zəmin yaradacığı heç kimdə şübhə yaratmasın. O Həzrət mütləq gələcək.
Əziz müsəlmanlar! Lakin O Həzrətin gəlişinə sadə yanaşmaq düzgün deyil. Yalnız dualarda o Həzrəti yad etməklə kifayətlənmək, zühurun fəlsəfəsi ilə daban-dabana ziddir. İslam bizdən onun gəlişi üçün zəmin hazırlamağı tələb edir. Xüsusilə son zamanlar inanclıların mübarək mübarizəsi müsəlmanlar arasında oyanışa səbəb olmuşdur. Bir sözlə, inanclıların ictimai-siyasi proseslərdə fəal olması, islami dəyərlərin cəmiyyətə, xalqa çatdırılmasında böyük fürsət yaradır.
Əziz müsəlman bacı və qardaşlarım! Bizim bu Oyanış Hərəkatını hərtərəfli şəkildə dəstəkləyən Sizlərsiniz. Allahın izni və bu dəstəyinizlə hərəkatımız ayaqda qalıb və günü-gündən güclənməkdədir. Şübhəsiz ki, düşmənlərimizin canına vəlvələ salan da məhz budur. Həbs olunmamışdan əvvəl dediyimiz kimi “biz ya meydandayıq, ya zindanda”. Xalqın hakimiyyəti tam bərqərar olana qədər biz bu rejimlə mübarizəmizi davam etdirəcəyik. Şüarımızın mənası da məhz budur. Sonda xalqımıza qənim kəsilən rejimə bir daha deyirik: “Etdiyiniz haqsızlıqlara, törətdiyiniz cinayətlərə görə bu dünyada xalqın, axirətdə isə Allahın qarşısında cavab verəcəksiniz!
Vəs-səlamu ələykum və rəhmətullahi və bərəkatuh!
Hacı Taleh, Kurdəxanı”