İqbal Ağazadə üçtəkərli velisoped sürəndə R.İbrahimbəyov böyük siyasətlə məşğul idi

Azərbaycan Respublikasında Demokrak Qüvvələrin Milli Şurasının təsisçi üzvü Eldəniz Quliyev Rüstəm İbrahimbəyovun Prezident seçkilərində namizədliyinə qarşı çıxıb onu təhqir edən hakimiyyətə bağlı Ümid Partiyasının sədrinə cavab verib.

İqbal Ağazadənin Rüstəm İbrahimbəyov haqqında “O siyasətçi deyi, seçki nə olduğunu bilmir” dedigini Milli Şuranın üzvü Eldəniz Quliyev belə şərh edib: “İqbal Ağazadənin səsləndirdiyi fikir həqiqətə uyğun deyil. R.İbrahimbəyov bir yazıçı, kinodramaturq, dünyaca məşhur bir sima olaraq fakt kimi mövcuddur. Bir şeyi yaddan çıxartmayaq ki, ortabab kinodramaturq və yazıçı Azərbaycan ölçülərində yaxşı bir siyasətçi deməkdir. Yaxşı dramaturq və yazıçı isə əla, peşəkar siyasətçi deməkdir”.
Eldəniz Quliyev : “Əgər biz həm İ.Ağazadəni, həm də R.İbrahimbəyovu siyasətçi tərəzisinə qoysaq, orada İ.Ağazadə R.İbrahimbəyovla müqayisədə çox-çox cılız görünər. İ.Ağazadə üçtəkərli velisoped sürəndə R.İbrahimbəyov böyük siyasətlə məşğul idi. Siyasət İqbal bəyin başa düşdüyündən daha geniş anlayışdır və bunu Rüstəm bəy yalnız İqbal bəyə deyil, onun kimilərin dəstəsinə izah edə bilər”.