İran İslam Respublikasının Azərbaycan Respublikasındakı səfiri- Möhsün Pak Ayin APA İnformasiya Agentliyi müxbirinin Azərbaycan Elmlər Akademiyasının işçisi- Xalidə Xalidin İranda həbs olunması məsələsi ilə əlaqədar sualına cavabda deyib: Azərbaycanın iki vətəndaşı İrana turist kimi səfər edib və qanunları pozduğuna görə həbs olunub.
Pak Ayin deyib: İranda heç kim səbəbsiz yerə həbs olunmur.
Bəzi medialar tərəfindən bu xəbərin şişirdilməsinə toxunan Pak Ayin əlavə edib: Bu xanım Azərbaycan Elmlər Akademiyasının işçisidir. Lakin onun həbsinin səbəbi, bu məsələ deyildir. Bizim Azərbaycan Elmlər Akademiyası ilə yaxşı münasibətimiz var və bu akademiyanın işçiləri İranda keçirilən seminarlarda iştirak edirlər.
“Hal-hazırda 130-dan çox İran vətəndaşı Azərbaycanda narkotik maddələrə görə həbs olunub. Bu şəxslərin müxtəlif peşələri olub. Lakin öz peşələrinə görə həbs olunmayıblar. Onların məhkum olmalarının səbəbi, Azərbaycan qanunlarının pozulması olmuşdur” –deyə İran səfiri söyləyib.
Bu hadisənin iki ölkə münasibətlərinə təsir göstərməyəcəyinə toxunan Pak Ayin bildirib: Bu məsələ münasibətləri təsir altında qoya bilməz və iki ölkə arasında münasibətlər yüksələn xətt üzrə irəliləyir.