İraq şiələrinin təqlid mərcələrindən biri Misirdə 4 şiənin sələfilər tərəfindən qətlə yetirilməsinə reaksiya olaraq, bu cinayəti törədənlərin cəzalandırılmalarını istəyib.
Misir medialarının məlumatına görə, Məhəmməd Təqi əl-Müdərrisi bir bəyanat yayaraq, Misirin Əbu Müslüm kəndində baş vermiş hadisəni təəssüf doğuran və kədərləndirici hadisə adlandırıb.
O, daha sonra bildirib: Misir xalqı üçün baş vermiş bu faciədə bir qrup ifratçı sələfi Misirin parlaq keçmişinə, tarixinə, şərəfinə, ləyaqətinə və təhlükəsizliyinə təcavüz etmiş olub. Bu bizi də şok vəziyyətinə saldı.
Məhəmməd Təqi əl-Müdərrisi əlavə edib: Şeyx Həsən Şəhatə və onu müşayiət edənlərin amansızlıqla və vəhşicəsinə qətlə yetirilməsinin heç bir səbəbi olmayıb. Onların yeganə günahı 15 Şəban, İmam Zaman(ə)-ın səadətli təvəllüdünün ildönümü günü münasibətilə mərasim təşkil etmələri olub.
İraq şiələrinin bu təqlid mərcəyi həmçinin deyib: Bu təhqiramiz rəftar Misir xalqının tarixində misli görünməmiş bir hərəkətdir və sələfi düşüncəsi, beynəlxalq sionizmin dəstəyi, neft dollarlarının himayəsi və ərəb şeyxlərinin fitvası bu kimi çirkin əməllərin başlıca amilidir. Bu, Misir xalqı üçün təhlükə siqnalı sayılır və bunun qarşısı alınmazsa, cəhənnəmin qapıları onların üzünə açılmış olacaq.
Məhəmməd Təqi əl-Müdərrisi Misirin üzləşdiyi gərgin vəziyyətə və təhlükəsizlik problemlərinə işarə edərək, təhlükəsizlik orqanlarının ölkənin təhlükəsizliyinin təmin edilməsindəki acizliyini, polisin gözləri önündə din alimlərinə işgəncələrin edilməsini xatırladıb və deyib: Bu təhlükəli hadisələrin sonda ağır nəticələrə səbəb olacaq. Buna görə də səbəbkarların və cinayətkarların hüquqi yolla məsuliyyətə cəlb edilməsi və cəzalandırılması, cinayət dəstəsi başçılarının zərərsizləşdirilməsi yolu ilə bu fitnə odunun söndürülməsi vacibdir.
İraq şiələrinin təqlid mərcələrindən olan əl-Müdərrisi sonda Misirdə öldürülən 4 şiəni etnik və məzhəbi fitnənin qurbanları, şəhidləri adlandırıb və bu şəhidlər üçün ümumi matəm elan edilməsini istəyib.