Anar Qasımlı: Avropa Məhkəməsinə şikayət edəcəyik
Azərbaycan İslam Partiyasının həbsdə olan sədrinin vəkili Anar Qasımlı Ali Məhkəmənin Möhsün Səmədov haqda çıxarılmış ədalətsiz məhkəmə qərarı ilə bağlı apelyasiya şikayətinə baxmaqdan imtina etməsinin ardınca deyib: Avropa Məhkəməsinə şikayət edəcəyik.
Faktxeber.com-un məlumatına görə, Anar Qasımlı məhkəmə iclasının bağlı qapılar arxasında keçdiyini və apelyasiya şikayətinin təmin edilmədiyini bildirib və deyib: Beləliklə bizim ölkə daxilindəki işimiz başa çatmış oldu. Biz məhkəmə qərarının surətini aldıqdan sonra Avropa Məhkəməsinə şikayət edəcəyik.
A.Qasımlı məhkəmə iclasının tam ədalətsiz formada keçdiyini bildirərək, deyib: Apelyasiya şikayətinin 6 nəfər haqda hazırlanmasına baxmayaraq, məhkəmə iclası cəmi 10 dəqiqə çəkdi.
İslamçı Məhbusların Hüquqlarını Müdafiə Komitəsi və İslam Partiyasının Mərkəzi Şurasının iclasında iştirak edənlər bildiriblər ki, Ali Məhkəmənin ilkin instansiya məhkəməsinin qərarını təsdiq etməsini nəzərə alaraq, islamçılar Azərbaycanın məhkəmə sistemini sifarişli həbslərə yaşıl işıq göstərən qeyri-müstəqil və asılı bir sistem elan edərək, Ali Məhkəmənin qərarına etirazlarını bildiriblər.
İslam Partiyasının Mərkəzi Şurası da bu məsələ ilə əlaqədar Avropa Məhkəməsinə şikayət etmək niyyətində olduğunu bildirib.
Qeyd edək ki, İslam Partiyasının Ali Şurasının 2 yanvar 2011-ci il tarixli iclasında çıxış edən partiya sədri Hacı Möhsün Səmədov islama qarşı yönəlmiş siyasətlərinə və orta məktəblərdə hicabdan istifadənin qadağan edilməsinə habelə, sosial ədalətsizliklərə, rüşvətxorluğa, korrupsiyanın genişlənməsinə, məmur özbaşınalığına, məhkəmə sisteminin ədalətsizliklərinə, qanunların icra olunmamasına görə, hakimiyyəti kəskin formada tənqid etmişdi. Bu hadisədən 5 gün sonra polis əməkdaşları saxta bir ssenari əsasında Hacı Möhsün Səmədovu və digər partiya rəsmilərini habelə, bir qrup islamçını həbs etdilər. Ağır ittihamlarla üzləşən islamçılar haqda sifarişli məhkəmə tərəfindən uzunmüddətli həbs qərarları çıxarıldı və Hacı Möhsün Səmədov 12 il müddətinə azadlıqdan məhrum edildi. Onunla birlikdə həbs edilən partiya rəsmiləri və islamçılar da 10-11 il müddətinə həbsə məhkum edildilər.