İran qazını Pakistana nəql edəcək “Sülh” boru kəməri layihəsinin icra əməliyyatına bu gün iki ölkə prezidentlərinin iştirakı ilə keçirilən xüsusi bir mərasimdə start verildi.
İran və Pakistan prezidentləri Mahmud Əhmədinejad və Asif Əli Zərdari bu gün iki ölkə sərhədinin sıfır nöqtəsində İran qazını Pakistana nəql edəcək boru kəməri layihəsinin icra əməliyyatının başlanması münasibətilə keçirilən mərasimdə “Sülh” boru kəməri layihəsinin təkmilləşdirilməsinin regionda sülh, təhlükəsizlik və inkişafa zəmanət verəcəyini bildiriblər. bu barədə azeri.sahartv.ir saytı məlumat verir. M.Əhmədinejad və A.Ə.Zərdari İran qazını Pakistana nəql edəcək boru kəmərini iki ölkə və region ölkələrinin xeyrinə olan bir layihə adlandıraraq, onun Tehran və İslamabad arasında iqtisadi, siyasi və təhlükəsizlik əməkdaşlıqlarının daha da artırılmasına zəmin yaradacağını deyiblər.
İran prezidenti bu layihənin icrasını Tehran və Pakistan arasında ikitərəfli və regional əməkdaşlıqların genişləndirilməsi istiqamətində növbəti addımlar üçün müqəddimə adlandırıb və deyib: Digər region ölkələri ilə də əldə olunacaq razılıqlar əsasında bu boru kəmərini Pakistanın şərq və şimal şərq sərhədlərinə çatdırmaq olar. Belə olacağı təqdirdə region ölkələri arasındakı əlaqələr daha da genişlənmiş və möhkəmlənmiş olacaq.
Əhmədinejad düşmənlərin regionun sərvətlərinə nəzarəti ələ keçirmək üçün təfriqə ardınca olduqlarını deyərək, vurğulayıb: Region ölkələri və xalqları bir-birinin kənarında yer alaraq, düşmənlərin fitnələrini zərərsizləşdirməlidirlər.
İran prezidenti həmçinin xatırladıb ki, region ölkələri öz sərvətləri və potensiallarını əməkdaşlıqların genişləndirilməsi yolunda səfərbər edərlərsə, o zaman regionumuz elm, sənaye və abadlıq baxımından inkişaf edər və xaricilərdən asılılığa son qoyular.
Pakistan prezidenti Asif Əli Zərdari də “Sülh” boru kəmərinin icra əməliyyatının başlanması mərasimində İran ilə ikitərəfli əlaqələrin inkişafına təkid edərək, deyib: Bu boru kəməri Pakistanın inkişafı və abadlığına xidmət edəcək tarixi və həyatverici bir damar hökmündədir.
Asif Əli Zərdari daha sonra ehtiyacların təmin edilməsi üçün təcrübələrdən qarşılıqlı formada istifadənin edilməsini vacib adlandırıb və deyib: İran və Pakistan ikitərəfli əlaqələrin daha da genişləndirilməsi qərarına gəliblər.
İran İslam Respublikasının neft naziri Asif Əli Zərdari də bu mərasimdə İranın öz zəngin neft və qaz ehtiyatları ilə region xalqlarının xidmətində olduğunu deyərək, vurğulayıb: Regionun hər bir ölkəsi özünəməxsus özəlliklərə malikdir və əgər bu xüsusiyyətlərdən kompleks şəklində istifadə edilərsə, o zaman region xalqlarının inkişafı, rifahı və təhlükəsizliyinə zəmanət vermək olar.
İranın Neft Nazirliyi və podratçı şirkətlərin proqnozlarına görə, “Sülh” boru kəmərinin icra əməliyyatı 2 il davam edəcək.
Tehran və İslamabad arasında imzalanmış müqaviləyə əsasən bu boru kəməri 2014-cü ilin dekabrında istifadəyə verilməli və gündəlik olaraq İrandan Pakistana 21.5 milyon kubmetr mavi yanacaq nəql edilməlidir.
