ABŞ Senatında sanksiyalarla bağlı qanunlara nəzarət edən bank işləri komitəsinin sədri İrana qarşı yeni sanksiyaların tətbiq edilməsi ilə müxalifət edib.
Röyters-in məlumatına görə, ABŞ Senatının bank işləri komitəsinin sədri İrana qarşı sanksiyaların artırılması ilə müxalifət edib.
Senator Tim Conson deyib ki, o, Obama hökuməti ilə razıdır və hazırkı şəraitdə yeni sanksiyaların tətbiq edilməsi İran ilə müzakirələrin gedişinə xələl gətirə bilər.
ABŞ dövlət katibinin müavini və İran ilə 5+1 Qrupu arasındakı nüvə müzakirələrində ABŞ-ın nümayəndə heyətinə sədrlik edən Vendi Şerman ABŞ Senatının Bank, Mənzil və Şəhərsalma İşləri Komitəsində keçirilən dinləmə iclasında iştirak edərək, deyib:” İcazə verin bir şeyi aydın formada bəyan edim. Bizim İranla bağlı siyasətimiz dəyişməyib. Prezident tam aydın formada bildirib ki, İrana nüvə silahı əldə etmək icazəsi verməyəcək”.
ABŞ Senatının bank işləri komitəsinin sədri senator Tim Conson isə nüvə müzakirələrindəki amerikalı heyətin sədri Vendi Şerman və Deyvid Kohenin iştirakı ilə keçirilən dinləmə iclasında deyib: Biz, bu məsələ ilə əlaqədar Qərbin birliyinə zərbə vuracaq addım atmamalıyıq.
O, əlavə edib: Biz İrana, 5+1 Qrupu üzvlərinə və ya istənilən ölkəyə öz məsuliyyətlərini bizim öhdəmizə atmaq icazəsi verməməliyik.
