İranın Müqəddəs Müdafiə dövrünün fədakarlarından olan İrəc Roğənçi Ümumdünya Səhiyyə Təşkilatının nəzərində İranın ən pak şəhəri olan Baft şəhərindən UNESCO-nun nəzərində İranın ən gözəl və inkişaf etmiş şəhəri olan Təbrizə doğru velosiped yürüşünün davamında paytaxt Tehrana daxil olub.
Təbrizli velosipedçi İrəc Roğənçi Baft şəhərindən Tehrana kimi olan 10 günlük yürüşü zamanı yolda onu qarşılamağa gələn insanlara üzərinə “pak su, pak torpaq və sağlam insan” şüarı yazılmış vərəqələr paylayıb.
İranın Alpinizm Federasiyasının məşqçisi və Velosipedsürmə Federasiyasının üzvü- İrəc Roğənçi Tehranda olduğu zaman Beynəlxalq “Səhər” Telekanalının Azəri Televiziyasına müraciət edərək, yol boyu çəkdiyi foto-şəkilləri təqdim edib və ekologiyanın mühafizəsi istiqamətində olan hərəkətinin təbliğ edilməsini istəyib.
İ.Roğənçi səfər boyu milli, mədəni və dini baxımdan dəyərli məkanları da ziyarət edib.
Müqəddəs Müdafiə dövrünün böyük sərkərdələrindən olan Şəhid Himmətin Şəhr Rza şəhərindəki məzarı üstə fatihə oxumaq, təbrizli alim Əllamə Məhəmməd Təqi Cəfəri-Təbrizinin Yəzd ostanındakı kitabxanasına baxış keçirmək, Qum şəhərində Xanım Məsumə(s.ə)-nın pak məzarını ziyarət etmək, İrana Sasanilər dövrünə təsadüf edən dünyanın ilk tağlı körpüsü olan İzədşəhr şəhərini ziyarət etmək, Kerman vilayətinin tarixi Babək şəhərinə baxış keçirmək bu təbrizli velosipedçinin yol boyu baş çəkdiyi məkanlardırlar.
İrəc Roğənçinin çərşənbə günü Təbriz şəhərində olacağı ehtimal olunur.
