BMT-nin silah müfəttişlərinin Suriyada kimyəvi silahdan istifadə ilə bağlı araşdırmaların nəticələrini elan etmələri ilə Rusiya ilə Qərb arasındakı ixtilaflar yenidən dərinləşib.
İRİB-nin məlumatına görə, ABŞ prezidenti BMT müfəttişlərinin Suriyada kimyəvi silahdan istifadə ilə bağlı hesabatı haqda verdiyi açıqlamada məqsədyönlü və qərəzli ifadələrdən istifadə edib və bir daha Suriya hökumətini kimyəvi silahlardan istifadə etməkdə günahlandırıb.
Obama deyib: Suriyada hakimiyyətin ötürülməsi və Əsədin hakimiyyətdən kənarlaşdırılması siyasəti davam etdiriləcək.
ABŞ-ın dövlət katibi də Təhlükəsizlik Şurasında Suriya haqda kəskin bir qətnamənin qəbul edilməsini zəruri adlandıraraq, deyib: Hərbi müdaxilə seçimi gündəmdə qalmalıdır.
Qərbin Suriya ilə bağlı növbəti dəfə qalmaqal yaratması elə bir şəraitdədir ki, BMT-nin silah müfəttişləri bazar ertəsi günü yayımlanan hesabatlarında kimin kimyəvi silahdan istifadə etməsinə işarə etməyiblər.
Rusiya Xarici İşlər Nazirliyinin sözçüsü isə Qərbin yenidən Suriyaya qarşı təbliğata başlamasını qınayaraq, İngiltərə xarici işlər nazirinin Suriyadakı müxalif qüvvələrin günahsız olması barədəki sözlərini tənqid edib və deyib: Rusiya rəsmiləri dəfələrlə tam aydın və şəffaf formada Suriyada silahlı müxalifət və yaraqlı qüvvələrin kimyəvi silahlardan istifadə etmələri barədə tutarlı və təsdiq olunmuş faktlar təqdim ediblər.
BMT-nin Təhlükəsizlik Şurasının 5 daimi üzvünün nümayəndələri dünən Cenevrədə ABŞ və Rusiya arasında əldə olunmuş anlaşma əsasında Suriya ilə bağlı yeni qətnamə layihəsi barəsində danışıqlara başlayıblar.
BMT-nin baş katibi bir daha Suriya böhranı üçün diplomatiyanı yeganə həll yolu adlandırıb və ümidvarlıq edib ki, Cenevrə-2 iclası tez bir zamanda baş tutsun.
Bu arada əl-Minar telekanalı Suriya ordusunun Şəba qəsəbəsinin terrorçulardan təmizlənməsi əməliyyatında 50 yaraqlının öldürülməsindən xəbər verib.
Ölənlər arasında xarici ölkə vətəndaşları da var.
Onlarla silahlı şəxs isə Dəməşq Hava Limanına gedən yolun yaxınlığında yerləşən bu qəsəbədən qaçmağa nail olub.
Suriya ordusunun Şəba məntəqəsini terrorçulardan təmizləmə əməliyyatı 48 saat davam edib.
